S.கமாலுத்தீன் மதனி - அல்-ஜன்னத் மாத இதழ்

அஸ்ஸலாமு அலைக்கும் (வரஹ்…)
வல்ல அல்லாஹ் எல்லாவிதமான நற்பாக்கியங்களையும் நமக்கு வழங்கி அவனுக்காகவே வாழுகின்ற பாக்கியத்தை நம் அனைவருக்கும் தந்தருள்வானாக!
அதிகமான மக்கள் அல்லாஹ்வுடைய மார்க்கத்தைப் பற்றிய கவலையில்லாமல் வாழ்ந்து வருகின்றனர். உலக சிற்றின்பங்களைப் பெறுவதற்காக அயராது பாடுபடுகின்றனர். அதற்காக அதிகமாக உழைக்கின்றனர். அதேநேரத்தில் அல்லாஹ்வுடைய மார்க்கத்தைப் பற்றி தனக்குத் தெரியவில்லை என்பதைப் பற்றி சிறிதும் கவலைப்படுவதில்லை. தன்னுடைய மனைவி மக்கள் மார்க்கத்தைப் பற்றிய அறிவில்லாமல் இருக்கிறார்களே என்பதைப் பற்றியும் கவலைப் படுவதில்லை.
இஸ்லாமிய சந்ததியினர் பாலர் பருவத்திலிருந்து மார்க்கப் பற்றில்லாதவர்களாகவும் மாற்றாரின் கலாச்சாரத்தின்பால் ஈர்க்கப்பட்டும் வளர்க்கப்படுவதால் எதிர்காலத்தில் அவர்களிடத்தில் மார்க்கத்தை போதிப்பது கடினமாகிவிடுகிறது. இதனால் அவர்கள் இஸ்லாமிய விரோதப்போக்கை கடைபிடிப்பவர்களாக மாறிவிடுகின்றனர். இந்த நிலைதான் சமூதாயத்தில் ஆண் பெண் என்ற பாகுபாடின்றி பரவலாகக் காணப்படுகிறது. இதை கவலையோடு சிந்திப்பது இஸ்லாமிய பெற்றோர்கள் மீது கடமையாகும். மார்க்கத்தை கற்று அல்லாஹ்வின் பக்கம் அழைக்கின்றவர்கள் கரைந்து கொண்டே, செல்கின்றனர். இந்த நிலை நீடிக்கவிடக்கூடாது, தங்கள் பிள்ளைகளில் சிலரை மார்க்கத்தை கற்று அல்லாஹ்வின் பக்கம் மக்களை அழைக்கின்ற அழைப்பாளராக உருவாக்க வேண்டும். அதன் மூலம் பெற்றோர்கள் மகிழ்ச்சி அடையவேண்டும். காரணம் அல்லாஹ்வின் பக்கம் மக்களை அழைக்கின்ற பணியைவிடவும் சிறந்த பணி வேறு எதுவும் இருக்கமுடியாது என்பதில் அசைக்க முடியாத நம்பிக்கையை பிள்ளைகளிடத்தில் ஏற்படுத்தவேண்டும். குழந்தை பருவத்திலிருந்தே குழந்தைகள் திருக்குர்ஆனுடன் தொடர்புடையவர்களாக ஆகி குர்ஆனை முடிந்தவரை மனனம் செய்யுமாறு அவர்களை பெற்றோர்கள் தூண்ட வேண்டும்.
அன்றாடம் கடைபிடிக்க வேண்டிய வாழ்க்கை ஒழுங்குகளை கற்றுக்கொடுக்க வேண்டும். சிறிய வயதிலிருந்தே மதரசாக்களுடன் தொடர்பை அதிகப்படுத்தவேண்டும். அழைப்புப் பணிகள் நடைபெறும் இடங்களுக்கு அழைத்துச் செல்ல வேண்டும். இதை சமுதாயம் கடைபிடிப்பது காலத்தின் கட்டாயமாகும்.
உங்கள் நலன் நாடும்
S.கமாலுத்தீன் மதனி
அல்-ஜன்னத் மாத இதழ் மார்ச் 2012